قصيدة سالى هاشم التى اثارت ازمة

سالى سيد هاشم هذا هو اسمها طالبة بالصف الثانى الثانوي بمدرسة السيدة زينب الثانوية بنات اصبحت سالى محور للحديث بعد ان اثارت الجدل بين الكثيرين بسبب قصيدتها التى كتبتها للرئيس محمد مرسى  القصيدة تتحدث عن الاوضاع السياسية فى مصر وتنتقد فيها هذه الاوضاع وطلبت من المصريين انيقوموا بالصبر حتى يتم الخروج من هذه الازمات وقد قامت سالى بالقاء القصيدة ذات صباح فى الاذاعة المدرسية حتى فوجئت بالمديرةتطلب بايقاف الاذاعة وبعدد من المدرسين يتوعدونها واتهموها بانها تريد ان تولع البلد وتخريبها بدماغها ثم تم استدعاءها وزميلة لها كانت قد قامت بالقاء كلمة عبارة عن مقال لعلاء الاسوانى الى مكتب المديرة ليتحدث اليهم معلم اخوانى موجها اليهم الاتهامات وحكى للمديرة الامر من وجهة نظره التى قالت لسالى  إننى سأحيلك إلى مجلس تأديب وهاتيلى أبوكى يجى ياخد ملفك وانتى مش هتفضلى معايا فى المدرسة وشوفليلك مدرسة تانية تروحيها قمنا على اثرها عمل وقفة احتجاجيةيطالبون فيها بنقل المديرة مما ادى محاولة احد المعلمين ضربها

حــس
حس يا سيادة الريس بينا
حس بالنار اللى والعة فينا
حس بشهيد حلمه ضاع
حس بقهرة أهالينا
ليك رب هتقابله.. طب هتقوله إيه؟ لما يسأل جنابك علينا

حــس
حس بشوارع مليها دم
حس بقهرة أب وأم
حس ببيوت جُواها هم
والقلوب مليها الغم
حس ببلد بتموت
وعز شبابها بيتسم

حــس
حس بجدع عياله جاعت
نزل يوكلهم فكرامته اتباعت
اتسحل واتعرى فى وسط حكومتك
وبعد ده كله حقوقه ضاعت

حــس
ده أنا المصرى ابن البلد
حلمى فى وسط الميدان اتولد
حلمى فى بلدى تعلى لفوق
وحلمى قدامى اتعرى واتجلد

حــس
يا سيادة الريس شرفك فين؟
لما اتعرى المصرى الهمام
لما اتسحل واستغليت إنه راجل جعان
وعاوز تكممه وتكتف عزته
وتهز بلدنا.. بلد الشجعان
لا مش هسكتلك ولا اسيبك تنهش
فى لحم بلدى زى زمان

حــس
ما أصلى خلاص م الموت معودتش بخاف
عارف الموت؟ عارف معناه؟
الموت أحلام بتموت وتضيع
الموت مش بس موت الحياة
الموت صديق عمر يروح
وصاحبه يتوه مجراه
الموت مش بس روح بتطلع
الموت ابن يموت وأمه م تقدر تنساه
الموت أب انكسر ظهره
ابنه كان ظهره وقواه
الموت يعنى مستقبل بيموت ويضيع
وتموت أحلامك وياه

حــس
حق اللى اتعرى يا ريس فين؟
ولا هو اللى عراه أصلا مين؟
اللى عراه ظلم وكدب
اللى عراه حكم مهين
اللى عراه ديابة ملهاش إحساس
اللى عراه كلاب مسعورين
اللى عراه سكوت.. اللى عراه جبروت
اللى عراه سلطة بتكسر عين

(حــس)
ورسالتى أخيرة لنظام جبان
نظام فاسد ملوش عنوان
لو همــوت
لو دمى منك يلاقى الجحود
وتهددنى بسجن ظلام
ولا لوجوده أى وجود
... مش هتسكت فيا الصوت..
... مش هتسكت فيا الصوت..