من القصائد الجميلة جدا للشاعر جمال بخيت وتحدث فيها عن عدد من المشايخ الشهيرين بتلاوة القران ومزايا صوتكل منهم وبماذا تشعر عند سماع تلاوته القصيدة ذكرت عدد كبير من المقرئين فذكرت الحصرى والبهتيمى والمنشاوى والطبلاوى ونعينع والمشايخ عمران ورفعت وعبد الصمد وكثير مناصحاب اجمل الاصوات فى تلاوة القران
مسحراتى العروبة
حس الجبال والبوادى
حادى الجمال للخصوبة
نويت أسحر بلادى
مهد النبوة ف ضميرى
نور الحضارة ف مصيرى
ومسيرى أوصل مسيرى
أو يوصلوا لى ولادى
نويت أسحر صباحى
أهلى وبيتى وبراحى
واصحى حتى اللى صاحى
يا رب نور فؤادى
رمضان جمعنى بصوتى
وصلاتى رفضت سكوتى
يا فرقة لازم تموتى
يا حسى لازم تنادى
الله أكبر الله أكبر
لا إله إلا الله
مسحراتى العرب
ترتيلى بيصب ف نيلى
رقة وإحساس وحلاوة
وبنيت وزوقت سبيلى
على ندى أحلى تلاوة
لِسّانى باسمع ف الحصرى
بقلبى وبروحى وبصرى
تجويد على فن وتغريد
على شوق من الحس المصرى
على حنان على مية ورد
على رحمة ف عروقى بتسرى
لَِسانى باسمع ف الحصرى
وباعيش على صوته نعيمى
أبدأ صلاتى وتسليمى
يصاحبنى صوت البهتيمى
يباركنى حس المنشاوى
يطربنى حس الطبلاوى
يصفا لى حس الشيخ عمران
صوت عندليب .. ودعاء كروان
ساعة ما يتلو من القرآن
آيات رضا وإعجاز وبيان
المئذنة لما ارتفعت
عرفنا إن الشيخ رفعت
بيشد عودها بأدانه
وهيه دايبة ف وجدانه
نور الآيات لمس العمران
كل الشهور حاوطت رمضان
والحضرة بدأت بالغفران
عبد الصمد يتلو "الرحمن"
و "النور" وبعديها "الفرقان"
يأتينا من حلو الترتيل
وكأننا ف حضرة جبريل
أحمد ندا يقرا "الإنسان"
الروح تطيب من أوجاعى
ويهل صوت الشعشاعى
يسقينى من نبع "الكوثر"
و "التوبة" ف ضميرنا بتحضر
وآدى مصطفى من بيت سِمَاعِين
صب الندى ف روح السامعين
نِعلـَى معاه من دنيا لدين
صوت العرب يا مستمعين
بيذيع تلاوة على محمود
جدى انتشى وآخر العنقود
لما ابتدا بسورة "الإخلاص"
و "قل أعوذ برب الناس"
م البسملة بنقول : الله
ونعيدها تانى ف "صدق الله"
إسمع شعيشع واتهنى
على فرع منسوب للجنة
الصيفى .. غرد .. والبنا
لاقينا ف السورة وَطـَّـنـَا
ورأينا ف الروضة مكانا
الصيفى .. غرد .. والبنا
لا عرفت أمشى ولا أستنى
وبلادى مفتوحة قصادى
سمعت صوت شيخنا القاضى
عبد العظيم زاهر راضى
وأحمد نعينع لو يقرا
بالقلب أسمع وأنصت له
ومصطفى غلوش .. راغب
يقرا الآيات فابتسمت له
وأنا رايح أسحر ف بلادهم
وأمد قلبى بمددهم
ألاقى ناس بتقول : الله
وألاقينى ما أعرفش عددهم
أوصل بصوتى لأبعدهم
أقول يا مصر المحروسة
دول الولاد وأنا أسعدهم
ولا حد يعزف أرغولك
ولا حد ف الحق .. يطولك
ولا حد بيكى هايتساوى
على ندى .. أحلى .. تلاوة ..
المنشد :
مبروك عليكو النهار
يا اللى انتو صايمينه
مبروك عليكو الليل
يا اللى انتو قايمينه
مبروك عليكو الشهر
رحمة وعبادة وشفا
وفتح بالمعرفة
من العلى العظيم
المغنى :
اقرا لى ما تيسر .. من صفوة البيان
المصحف المفسر .. يملانى بالحنان
بين مكة والمدينة .. قرآن بيحس بينا
واللى تركه .. تحسر .. اقرا لى ما تيسر ...
اقرا لى من آياتى .. ما يسمو بالعقول
يشفى لى سنين حياتى .. بصلاتى على الرسول
والشمس وما بناها .. نور القرآن تباهى
بنصر نبينا طه .. صنم الأصنام تكسر
اقرا لى ما تيسر ...
اهدينى بحق "اقرأ" .. إحساس يشعر ويفهم
لسان .. ف الحق .. أجرأ .. وضمير بالعدل أعلم
اجعل ف العلم جاهى .. وصحح لى اتجاهى
واجعلنى يا إلهى .. لكل جميل ميسر
اقرا لى ما تيسر..
المؤدى :
انتى الخلود .. مهما تروحى
لا بتغرقى .. ولا بتنوحى
الدنيا تحتار من صمتك
وبتهمسى لى وتبوحى
انتى الخلود وانتى حياتى
ونجاتى وسفينة نوحى
بسم الله أسمع ترتيلك
المولى يهدينى فتوحى
لو الزمان عنك حاشنى
وصوتك الحلو وحشنى
يقابلنى صوت طه الفشنى
تطيب على البُعد جروحى
النقشبندى .. بيمشى وحيد
يملا بلاد الله تغريد
تسابيح مدد .. وغــُنا و تجويد
على ما تيسر من روحى
أنا باغنى يا مؤمنين
غنوة محبة لكل دين
الإنسانية قالت آمين
يا رب جمعا موحدين
إياك نعبد ونستعين
تعليقات
إرسال تعليق